PËR ORGANIZIMIN DHE FUNKSIONIMIN E BASHKISË SË TIRANËS

Lloji: Ligj

Fletore Zyrtare: nr. 24, datë 2000-07-08

LIGJ

Nr. 8654, datë 31.7.2000

PËR ORGANIZIMIN DHE FUNKSIONIMIN E BASHKISË SË TIRANËS

Në mbështetje të neneve 78, 83 pika 1 dhe 108-112 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Bashkia e Tiranës përfaqëson një unitet administrativo-territorial dhe bashkësi banorësh me status të veçantë.

Neni 2

1. Në Bashkinë e Tiranës funksionojnë:

a) Këshilli Bashkiak si organ përfaqësues i Bashkisë.

b) Kryetari i Bashkisë si organi ekzekutiv i Bashkisë.

2. Këshilli Bashkiak dhe Kryetari zgjidhen drejtpërdrejt nga populli me zgjedhje të lira, vetjake, të barabarta dhe të fshehta, sipas mënyrës së parashikuar në Kodin Zgjedhor të Republikës së Shqipërisë për zgjedhjen e organeve të qeverisjes vendore.

3. Këshilli Bashkiak dhe Kryetari gëzojnë të drejtat, kryejnë funksione dhe i ushtrojnë përgjegjësitë e përcaktuara për bashkitë në ligjin nr.8652, datë 31.7.2000 “Për organizimin dhe funksionimin e qeverisjes vendore”, me përjashtim të detyrave të përcaktuara për njësitë bashkiake në nenin 8 dhe 9 të këtij ligji.

Neni 3

1. Në Bashkinë e Tiranës funksionojnë 11 njësi bashkiake të qeverisjes vendore, të cilat kanë statusin e përcaktuar në këtë ligj.

2. Në njësinë bashkiake, organet përfaqësuese janë:

a) Këshilli i njësisë bashkiake si organ përfaqësues i njësisë bashkiake.

b) Kryetari si organ ekzekutiv i njësisë bashkiake.