Për prodhimin dhe tregtimin e duhanit dhe të cigareve

Lloji: Ligj

Fletore Zyrtare: nr. 45, datë 2000-12-31

LIGJ

Nr. 8691, datë 16.11.2000

PËR PRODHIMIN DHE TREGTIMIN E DUHANIT DHE TË CIGAREVE

Në mbështetje të neneve 78 dhe 83 paragrafi 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI :

KREU I

DISPOZITA TË PËRGJITHSHME

Neni 1

Ky ligj ka për qëllim të rregullojë prodhimin, tregtimin e duhanit të papërpunuar, përpunimin industrial, tregtimin e duhanit të përpunuar dhe të produkteve të tij në Republikën e Shqipërisë.

Neni 2

Mbikëqyrja dhe kontrolli i prodhimit dhe i tregtimit të duhanit dhe të produkteve të tij realizohet nga Ministria e Bujqësisë dhe e Ushqimit. Ministria e Financave, në përputhje me legjislacionin në fuqi, kontrollon anën fiskale.

Neni 3

Në kuptim të këtij ligji:

“Duhan” nënkupton gjethen e bimës së kultivuar të specieve Nikotiana tabacum, në të gjitha format dhe stadet e rritjes, të përpunimit dhe të manipulimit, kur nuk përdoren për konsum final.

“Prodhim bujqësor i duhanit” nënkupton prodhimin e farës, të fidaneve të duhanit, rritjen e tij në fushë, vjeljen, tharjen dhe manipulimin e duhanit nga prodhuesit.

“Përpunim industrial i duhanit” nënkupton klasifikimin, manipulimin, heqjen e kërcellit për duhanet gjethemëdha, fermentimin ose trajtimin termik dhe përgatitjen e duhanit për tregtim.