PËR RUAJTJEN DHE KONTROLLIN E KUFIRIT SHTETËROR TË REPUBLIKËS SË SHQIPËRISË

Lloji: Ligj

Fletore Zyrtare: nr. 23, datë 2001-05-18

L I G J

Nr. 8772, datë 19.4. 2001

PËR RUAJTJEN DHE KONTROLLIN E KUFIRIT SHTETËROR TË REPUBLIKËS SË SHQIPËRISË

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

DISPOZITA TË PËRGJITHSHME

Neni 1

Objekti i këtij ligji

Ky ligj përcakton:

a) rregullat e ruajtjes dhe të kontrollit të kufirit shtetëror të Republikës së Shqipërisë;

b) rregullat për kalimin e shtetasve shqiptarë ose të huaj dhe të mjeteve nga dhe në territorin e Republikës së Shqipërisë;

c) strukturën shtetërore dhe statusin e saj, me qëllim garantimin e zbatimit të këtyre rregullave.

Neni 2

Përkufizime

Në zbatim të këtij ligji termat e mëposhtëm kanë këto kuptime:

1. “Kalim i kufirit” kuptohet veprimi që kryhet për kalimin nga territori i një shteti në territorin e një shteti tjetër.

2. “Kontroll i kalimit të kufirit shtetëror” kuptohet kontrolli i personave dhe i mjeteve që hyjnë ose dalin në vendkalimet kufitare dhe të vlefshmërisë së dokumentacionit të tyre në çastin e kalimit të kufirit shtetëror.

3. “Ruajtja dhe kontrolli i kufirit shtetëror” kuptohet vëzhgimi dhe kontrolli i lëvizjeve në të dyja anët e kufirit shtetëror për parandalimin e veprimtarisë së paligjshme dhe të incidenteve kufitare.

4. “Vendkalim kufitar” kuptohet ajo pjesë e kufirit tokësor, ujor dhe ajror ku lejohet kalimi i ligjshëm i kufirit shtetëror.