Për organizimin dhe funksionimin e Këshillit të Lartë të Drejtësisë

Lloji: Ligj

Fletore Zyrtare: nr. 9, datë 2002-04-21

LIGJ

Nr. 8811, datë 17.5.2001

PËR ORGANIZIMIN DHE FUNKSIONIMIN E KËSHILLIT TË LARTË TË DREJTËSISË

Në mbështetje të neneve 81 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

KREU I

PËRBËRJA DHE STATUSI I ANËTARËVE TË KËSHILLIT TË LARTË TË DREJTËSISË

Neni 1

Këshilli i Lartë i Drejtësisë

Këshilli i Lartë i Drejtësisë është autoriteti shtetëror përgjegjës për mbrojtjen, emërimin, transferimin, shkarkimin, edukimin, vlerësimin moral e profesional, karrierën, dhe për kontrollin e veprimtarisë së gjyqtarëve të gjykatave të shkallës së parë dhe të gjykatave të apelit.

Neni 2

Detyrat e Këshillit të Lartë të Drejtësisë

Këshilli i Lartë i Drejtësisë ushtron këto detyra:

a) I propozon Presidentit të Republikës emërimin e gjyqtarëve të gjykatave të shkallës së parë dhe të gjykatave të apelit.

b) Vendos për shkarkimin e gjyqtarëve të gjykatave të shkallës së parë dhe të gjykatave të apelit.

c) Vendos për transferimin e gjyqtarëve.

ç) Vendos për marrjen e masave disiplinore ndaj gjyqtarëve.

d) Kujdeset për kualifikimin e gjyqtarëve.

dh) Vendos kriteret për vlerësimin e gjyqtarëve, kontrollon dhe garanton procesin e vlerësimit dhe shqyrton ankimet e gjyqtarëve për vlerësimin e tyre.

e) Emëron dhe shkarkon, kryetarët dhe zëvendëskryetarët e gjykatave të shkallës së parë

dhe të gjykatave të apelit.