Për Agjencinë e Trajtimit të Kredive

Lloji: Ligj

Fletore Zyrtare: nr. 23, datë 2002-06-08

LIGJ

Nr. 8894, datë 14.5.2002

PËR AGJENCINË E TRAJTIMIT TË KREDIVE

Në mbështetje të neneve 78, 81 pika 1 dhe 83 pika 1 të Kushtetutës, me propozimin e Këshillit të Ministrave,

KUVENDI

I REPUBLIKËS SË SHQIPËRISË

VENDOSI:

Neni 1

Qëllimi i këtij ligji është vendosja e rregullave për trajtimin e kredive të transferuara nga bankat tregtare të nivelit të dytë, me kapital tërësisht shtetëror, që më poshtë do të quhen “bankat”, tek Agjencia e Trajtimit të Kredive, që më poshtë do të quhet “Agjencia”, si dhe mënyra e drejtimit të kësaj Agjencie.

Neni 2

Për qëllime të këtij ligji, termat “aset” ose “asete” kanë kuptimet e mëposhtme:

a) Një pretendim për kredinë, duke përfshirë të gjitha mjetet e garancisë për sigurimin e detyrimit përkundrejt të gjithë personave fizikë a juridikë, nëse ata janë të regjistruar ose në regjistrim e sipër në datën e hyrjes në fuqi të këtij ligji, si dhe ato të zotëruara nga Agjencia në mbështetje të nenit 3 të këtij ligji, përfshirë shumën e principalit dhe të interesave të llogaritur për një pretendim të tillë.

b) Pasuritë e luajtshme ose të paluajshtme, që Agjencia i ka marrë në mbështetje të nenit 3 të këtij ligji.

Neni 3

1. Kreditë, asetet, pasivet dhe kapitali i Agjencisë së Trajtimit të Kredive, të marra prej saj, në mbështetje të ligjit nr.8339, datë 30.4.1998 “Për Agjencinë e Trajtimit të Kredive”, me hyrjen në fuqi të këtij ligji, i kalojnë kësaj Agjencie.